Komunidad - Ako Ay Filipino

Upang muling ibalik ang nakagawian at napagkasunduang pagpupulong ng mga leaders sa Roma, isang Forum ang inorganisa ni Labor Attache Chona Mantilla ng POLO sa Embahada noong ika-18 ng Pebrero.

Ang layunin ng pulong ay pag-usapan ang POLO-OWWA update, Mandatory Membership Republic Act 9679, Screening Program, at PIDA – Independence Day at ang opisyal na paghahayag sa paglisan ni Welfare Office Andrelyn Gregorio at Jaybee Vicente ng POLO.

Sina Minister & Consul General Danilo Ibayan, ang kasalukuyang Charge de Affairs ng Embahada at Consul Kristine Salle ay naging gabay nang araw na iyon. Sa umpisa ng pagpupulong sinabi ni Ibayan na siya’y natutuwa sa patuloy na pagsuporta at pakiisa ng mga Filipino leaders sa mga gawain ng embahada at ang ganitong pagpupulong ay lugar kung saa’y naibabahagi ang mga ideya at concern para sa mga OFWs.

Dumalo rin sa forum si Atty. Labo ng Pag-ibig, information officer mula pa sa Milano upang ibalita na mula pa noong ika-1 ng Enero 2010, ang Mandatory Coverage under Republic Act 9679 ng Pag-ibig Overseas Program ay ipinapatupad na. Ipinaliwanag naman ni Mr. Tony Carillo, ang representative ng POP Rome, ang nasabing Mandatory sa tulong ni Labo.

Sa pulong na ito ay nabigyan rin ng pagkakataon na maipakilala ang proyektong Programma di Screening sa pamamagitan ni Ms. Barbara ng ASP Lazio at ng inyong lingkod bilang cultural mediator. Ang programang ito ay para sa mga kababaihang migrante at ang layunin ng ASP kasama ng ASL RMA, C, D at E ay magbigay ng impormasyon tungkol sa PAP Smear at PAP Test mismo sa lugar na kung saan ay kalimitang nagkikita-kita ang mga dayuhang babae.

Malungkot namang tinanggap ng mga leaders ang balitang uuwi na rin si Welfare Officer Andrelyn Gregorio at Jaybee Vicente ng POLO sa Marso. Mabigat umano’ng tanggapin na si Ms. Gregorio, ang masipag, mabait, approachable, hands on at kaibigan ng lahat ay aalis na at muling papalitan ng bagong Welfare Officer. Ang tanong pa nga ng mga leaders, “Bakit naman ang dali ng term ni Ma’am Ann, ibig ba sabihin na panibagong pakikipagkilala at panibagong pakikisalamuha sa darating na taga OWWA?”. (Liza Bueno Magsino)

 

Maituturing na isang napakalaking oportunidad at karangalan ang pagkakaroon ng pagkakataon na makapanayam ang isa sa ating highest-ranking Filipino bishop, His Eminence Jose Cardinal T. Sanchez.  Ang panayam ay naitakda noong Marso 24 sa mismong bahay ng kardinal sa Via Rusticcucci, malapit sa Vatican, sa tulong ng ating Trade and Industry Assistant, Ms. Marie Gumabon-Lami.

Maaaring marami sa ating mga Pilipino ang hindi ganap na nakakakilala kay Cardinal Sanchez.  Isa sa masasabi nating dahilan ay ang pagkakatalaga at pagsisilbi niya sa Vatican sa loob ng  mahigit ng 20 taon.  Siya ay residente na din ng siyudad ng Roma sa mahigit ng dalawang dekada, pero walang alinlangan na siya ay 100% Pilipino, sa katunayan, ang kardinal ay tubong Bicol. 

Siya ay ipinanganak sa Catanduanes noong Marso 17, 1920 at naging ganap na pari noong taong 1946.  Siya ay naging Obispo noong 1968 at naging Archbishop of Nueva Segovia nang apat na taon, mula 1982 hanggang 1986.  Taong 1985 nang ipinatawag siya ng Kataas-taasang Pope John Paul II para maging Secretary of the Congregation for the Evangelization of Peoples.  Ang kanyang pagiging kardinal ay malamang na hindi naisakatuparan kung ang una niyang desisyong hindi paunlakan ang imbitasyon ng Papa noong 1985 ang nangibabaw.  Ito ay sa kadahilanang  una niyang naisip na gugulin sa ibang pastoral projects ang perang laan para sa kanyang pagpunta sa Vatican.  Naisip din niyang isumite ang kanyang report sa pamamagitan ng Apostolic Nuncio (Vatican Ambassador sa Manila), ngunit nang kanyang napagtanto na siya na lamang ang tanging Pilipinong Bishop na hindi pa nakakabisita sa Papa, dali-dali siyang nag-empake at lumipad papuntang Roma. 

Sa kanyang pulong sa Papa siya ay hinikayat na mamalagi pa sa Roma at buong pusong tanggapin ang posisyong inialok ng Vatican, ang maging Secretary of the Congregation for the Evangelization of Peoples. Hindi man siya ganoong kakumbinse na tanggapin ang posisyon dahil na rin na ang kanyang priyoridad ng mga panahong iyon ay ang mga pastoral projects sa Pilipinas, ito ay kanyang buong puso at walang pag-aalinlangang tinanggap sa kadahilanang ang mga pari at bishops ay duty-bound na laging sundin ang mga kautusan ng Papa. 

Ito ay isang napakalaking karangalan para sa kardinal at sa mga Pilipino dahil ang isang sekretarya ng Vatican ay maihahalintulad sa pagiging pangalawang ministro ng gabinete ng pamahalaang Vaticano. Ito rin ang nakapagbigay sa kardinal ng pagkakataong makalibot sa iba’t-ibang parte ng mundo para sa pagpapahayag ng ebanghelyo. Pagkalipas ng tatlong buwan ng kanyang appointment, namalagi na siya sa Roma bilang miyembro ng Roman Curia (the government of Universal Church). 

Ang anim na taong eksperyensya bilang sekretarya ng major curial department ng Vatican ang naghubog sa dating Archbishop para maging handa sa pagiging Prefect.  Taong 1991, nang ang Cardinal Innocenti ay dumating na sa kanyang retirement age, ang posisyon niyang Prefect of the Congregation for the Clergy ay ini-appoint ni Pope John Paul II sa dating Archbishop Sanchez.  Buwan ng Hunyo ng nasabing ding taon, si Archbishop Sanchez ay initaas sa College of Cardinals at naging ika-limang Pilipinong bishop na nabigyan ng ganoong kataas na distinksyon ng Vatican.

Hanggang sa mga taong ito, si Cardinal Jose T. Sanchez lamang ang tanging kardinal na Pilipino na humawak ng posisyong secretarial at prefectorial sa Roman Curia.  Umaasa ang kardinal na marami pang paring Pilipino ang mabibigyan ng pagkakataon na ma-appoint sa Vatican sa kadahilanang kung eksperiensya ang pag-uusapan in terms of pastoral at administrative work, maraming Pilipinong pari ang qualified.

Nang ang kardinal ay hiningan ng mensahe para sa mga Pilipinong kasalukuyang namamalagi sa Italya, kanyang binigyan ng diin ang kahalagahan ng Christian faith, aniya “Christian faith gives direction to one’s life.  The Christian family is necessary to preserve the Christian doctrine and the true Christian faith.”
May kaunting pagkadismaya ang kardinal sa pagkaunti ng mga Pilipinong inilulunsad sa pagpapari. 

Ang Pilipinas ay nasa ikalawang puwesto sa bilang ng Catholic population sa buong mundo kasunod ng Brazil, pero may mahigit lamang na 9,000 na Pilipino ang inaasahang maging pari sa mga sumusunod pang mga taon. Ang nakita niyang isang malaking dahilan nito ay ang pagkaunti ng mga Catholic schools sa bansa at sa kakulangan din ng mga pagkukunan ng panggugugol ng mga Pilipinong gustong maging pari.  Sa edad na 90, ang Kardinanl ay nasa maayos na kalusugan maliban lamang na mahina na ng kaunti ang kanyang pandinig.  Hindi niya iyon nakikitang sagabal sa kanya pang ibang misyon bilang alagad ng Diyos.  Kung matutuloy ang plano niyang pag-uwi at mamalagi na sa Pilipinas, inaasam niyang gugulin ang natitira pa niyang mga taon para makapag-contribute pa sa bansang sinilangan. Aniya, malaki pa ang maitutulong niya sa mga pastoral projects ng bansa.

Naging mainit ang naging pagtanggap sa amin ni Cardinal Sanchez, kasama na ang dalawang Pilipinang madre na umaalalay sa kardinal. Ang taong aming nakaharap at kinapanayam ay may mahalagang posisyon sa civil protocol.  Siya ay may ranggong katumbas ng mga prinsipe at prinsesa ng mga reigning royal houses sa mga seremonial functions.  Ang panayam ay umikot din sa maraming topics at sa kabila ng kanyang posisyon, kapansin-pansin ang kanyang pagiging casual at pagkamagalang sa pagsagot sa mga katanungan.  Kapansin-pansin din ang kanyang pagiging hospitable at pagkamaaalahanin sa paulit-ulit na pag-alok sa amin na uminom at tumikim ng inihandang merienda.  Hindi ko maaaring makalimutan kung paano niya kami inihatid ni Ms. Lami hanggang sa pintuan ng kanyang tahanan at kung paano niya kami inihatid ng tingin sa aming pagbaba ng palasyo gamit ang elevator ng condominio. 
Mula sa Ako Ay Pilipino, maligayang ika-90ng kaarawan at maraming, maraming salamat, Cardinal Sanchez! (Rogel Esguerra Cabigting)

 

Isang prebelehiyo para sa mga Pinoy sa Napoli na mapabilang sa selebrasyon ng Messa dei Popoli (Mass of the People) noong ika-6 ng Enero 2010 at piyesta ng Epifania sa Cattedrale ng Basilica ng San Gennaro na kilala sa miracolo na natutunaw na dugo tuwing kapistahan (Setyembre 19).

Sa simula pa lang ng selebrasyon ng misa isang panimulang awit ang inawit ng mga Pinoy Choir habang naglalakad patungong altar ang mga pari at sa pangunguna ni Mons. Pasquale Silvestri, Direttore ng Ufficio Migrantes at Arcivescovo ng Metropolitana ng Napoli na si Eminenza Cardinal Crescenzio Sepe.

Sa misa, si Ms. Andrelyn Gregorio, OWWA Welfare Officer sa Roma ang naimbitahang bumasa ng 1st reading, ang Responsarial Psalm, ay binasa sa wikang italyano ni Adriano Posadas, isang estudyante na malapit ng maging abogado at ito’y isang karangalan ng mga Pinoy.

Samantalang sa Offertory ay dalawang Pinay ang kasali na sina Elisa Duenas ng Roma at Herminia Lacerna ang mapalad na nakahalik sa kamay ng Arcivescovo habang ibinibigay ang mga alay.

Iba’t ibang lahi ang dumalo sa pagdiriwang na humigit kumulang isang libo na nagpakita ang kani-kanilang praising kabi; ang Nigeriane, Latino Americano, Pollachi, Sri Lanka, Cinese, Uckraine pero higit pa rin ang Pinoy dahil sa lahat sa kanila tanging isang Pinay ang kabilang sa paghahanda sa katauhan ni Gina Marasigan na tatlong taon ng Consultant ng Ufficio Migrantes at sya ring tumatayong Presidente ng Comunità Filippina di Napoli e Campania kung kaya laging espesayal ang partisipasyon ng mga Pinoy.

Marami ring Pinoy ang nagsimba kung kaya’t nang binati ng Cardinal ang mga dayuhan sa kanilang salita, ang  mga Pilipino ang panghuli at pinakamalakas ang palakpak nang sabihing “Maligayang bati sa inyong lahat at Pagpalin kayo ng Poong Maykapal” ay umalingawngaw ang palakpakan sa buong Cathedral.

Nasa 200 bata ang nabigyan ng mga regalo na ipinamahagi ng Ordine di Malta at Movimento Lavoratori Cristiani at marami ring mga batang Pinoy ang nakatanggap nito. (NYLEC)

 

Sa edad na siyam na taon, umani na ng maraming karangalan sa larangan ng karate ang Pilipinong Karate Kid

Hindi na mabilang ang mga kabataang Pilipino na unti-unting tumatawag ng pansin at nakikilala sa Italya dahil sa kani-kanilang pag-angat sa iba’t-ibang larangan.  Isa na dito ang siyam na taong gulang na si Carl Vincent Ortega Aloya na namamayagpag sa larangan ng KARATE.  Si Carl Vincent ay nakasanayan ng tawaging Carlo ng kaniyang mga magulang at malapit na mga kamag-anak.  Siya ay  ipinanganak noong Oktubre 23, 2000, mismo sa siyudad ng Terni.  Siya ay panganay na anak nina Mr.  & Mrs. George Napa Aloya na naninirahan sa Terni sa loob na ng mahigit na labing-limang taon.

Hindi naman katakatakang magkaroon ng malaking interes si Carlo sa karate dahil ang kanyang tatay na si George ay dati ng kasapi ang iba’t-ibang pangkat sa Pilipinas na may kinalaman sa self defense, katulad ng Arnis, Judo Karate at Taekwando.  Sa kasalukuyan, siya ay aktibo pa rin sa mga pagsasanay ng Kali Silat at Krav Maga Contact Combat sa Terni.

Sa loob lamang ng tatlong taon magmula ng magsanay si Carlo ng karate ay agad siyang kinakitaan ng mabilis na pag-unlad sa nasabing larangan.  Isang pagpapatunay nito ay ang mga premyong medals na nakamit ni Carlo sa iba’t-ibang mga karate competition sa Italya.  Maituturing na hindi masyadong naging maganda ang resulta ng kauna-unahang competition kung saan isinali si Carlo pagkaraan lamang ng tatlong buwan na pagsasanay. Hindi naman nadismaya si Carlo sa resulta ng nasabing kompetisyon at itinuring na lamang niyang isang malaking hamon ang kanyang pagkatalo. 

Hindi naman siya nabigo dahil ang kanyang sumunod na laban, sa kompetisyong First Coppa del Presidente Kata noong Pebrero 22, 2009 na ginanap sa Monterotondo, nakamit niya ang ikalawang pwesto.  Itinuturing ng batang si Carlo na ang pinaka-espesyal na competition na kanyang nasalihan ay ang 3° Campionato Italiano e Coppa Italia na naganap noong Abril 17-18, taong kasalukuyan sa Tivoli. 

Bukod sa nakamit niya ang markang 1° Classificato, marami din siyang nakilalang mga bagong kaibigan sa nasabing kompetisyon.

Si Carlo ay kasalukuyang sinasanay ni Maestro Luigi Gigante (Maestro di Karate 5 dan) sa ilalim ng grupong Shitoryu Shikokai Union Karate Italia.  Mismong si Maestro Luigi ang nagbansag kay Carlo na “il piccolo drago” dahil sa kanyang sunod-sunod na pagkapanalo sa iba’t-ibang mga karate competition sa bansa.  Bukod pa dito, sa murang edad na siyam, si Carlo ay kinakitaan din ng matinding pagmamahal at dedikasyon sa karate. 

Hindi lamang sa karate champion si Carlo dahil matataas din ang kanyang mga grades sa halos lahat ng kanyang subjects. Music at History ang kanyang paboritong mga subjects.  Sa kanyang paglaki, pinapangarap niyang maging maestro din ng karate.  Si Carlo ay nakatakdang magpakitang gilas sa Cambio di Cintura sa darating a Sabado, Hunyo 26 at nakakasigurado ang lahat na habang binabasa ninyo ang artikulong ito ay naipagkaloob na kay Carlo ang plain orange belt (Nang siya ay nakapanayam noong Hunyo 22, ang kanya pang hawak na belt ay yellow-orange). 

Walang kaduda-duda na kayang kaya niyang masupera ang pagsusulit sa pagpapalit ng belt.  Todo todo ang suportang ibinibigay ng mga magulang ni Carlo sa kanya, kasama na ang bunso niyang kapatid na si Alessandro. Kaya naman walang duda ang magiging tagumpay pa niya sa larangan ng karate sa darating na panahon.

Para sa future black-belter na si Carlo, ikinakarangal ka ng bawa’t Pilipino.  Sana ay maging huwaran ka ng iba pang batang Pilipino na naririto sa bansang Italya.  Mabuhay ang mga kabataang Pilipino sa Italya! (Rogel Esguerra Cabigting)

Matagal na inaantay ng ating mga kababayang OFW sa Napoli ang pag-umpisa ng Leadership and Social Entrepreneurship Training Program. Ito ay inilunsad noong ika 24 ng Enero sa meeting hall ng Chiesa Agostino, Sta. Teresa Degli Scalzi.

 

Si dating OWWA Welfare Officer Ann Gregorio ang siyang nagbukas ng programa at mainit na pangtanggap sa mga participants; sumunod na nagsalita ang mga representante ng ibang mga institusyon na nagpapatakbo ng nasabing programa: si Maris Gavino, bise-presidente ng Associazione Pilipinas OFSPES; si Edgar Valenzuela ng OFSPES Philippines at nina Cristyl Mae Senajon ng Ateneo University School of Government at Vincent Rapisura ng Ateneo University at SEDPI na siya ring pinaka-resource person para sa unang module na tungkol sa financial literacy.  Si Cristina Liamzon, presidente ng Associazione Pilipinas OFSPES ang nagbigay ng kalahatang pagpapaliwanag tungkol sa programa ng LSE, ang layunin ng programa at ang mga kinakailangan para makapasok at makatapos ng training. Ipinaliwag din kung anu-ano ang mga module o paksa na tatalakayin sa mga session.

 

Ang programang ito na isang kolaborasyon ng limang institusyon: Philippine Embassy to Italy, ang Philippine Overseas Labor Office (POLO), Overseas Workers Welfare Administration (OWWA) at ng Associazione Pilipinas OFSPES ay unang ginanap sa Roma. Ang pinakaunang grupo (LSE1) ay nag-umpisa noong Abril 2008 at ang mga pangunahing mga trainees ay nagtapos ng 16 na sessions sa loob ng isang taong pag-aaral. May 37 na nagtapos galing sa 51 na natanggap sa programa. Ang sumunod na grupo, bunibuo ng 49 na trainees ay nag-umpisa noong Hulyo 2009 at ang kanilang graduation ay nakatakda para sa ika-18 ng April ngayong taon 2010.

 

Sa hiling ng ating mga kababayan sa Napoli, ang LSE ay inumpisahan noong buwan ng Enero at matatapos ang 16 na session sa Oktubre 2010; may dalawang session ang nakatakda bawat buwan – sa tuwing ikatlo at ikaapat na Linggo.


May humigit sa 30 participants ang dumalo sa unang training session ng LSE-Naples.

 

Muling pinaaalam sa ating mga kababayang nakatira sa Napoli at karatig lugar na sumali sa LSE program na tiyak na makakatulong sa pagpapalawak ng mga kaalamanan tungkol sa pagiging mas mahusay at matatatag na mga lider at sa pagbubuo at pagtatayo ng mga social enterprise (o kaya’y mga business na mayroong aspetong tumutugon sa mga problema sa ating mga komunidad o lipunan).

 

Para sa nagnanais ng mas marami pang impormasyon ukol sa LSE program para sa Napoli, mag-email lamang kay: This email address is being protected from spambots. You need JavaScript enabled to view it.">This email address is being protected from spambots. You need JavaScript enabled to view it.. Ang programa ay bukas sa mga gustong sumali hanggang sa katapusan ng Enero 2010.

(Associazione Pilipinas Ofspes - Non-profit)

Muling naipakita ng mga batang pinoy ang kanilang talento sa pag-awit at sila’y pinuri ni Assessore Rosa Maria de Giorgi ng Pubblica Istruzione.  

Sa Teatro Puccini, Firenze noong ika-28 ng Marso 2010, matagumpay na konsiyerto para sa pagdiriwang ng “Pace Dei Bambini” (Kapayapaan para sa mga Bata) ang hinahangaan ng mga manonood. Ang partisipasyon ng batang Pinoy ay lubhang hinahangaan at walang humpay na palakpakan at sigawan dahil sa tuwa at paghangan ng mga manonood nang awitin ng mga ito ang “Heal the World” at “You Raise me Up”.  

Pinuri at pinasalamatan naman ni Sig. Mario Peccioli, director ng Melograno Piccolo Coro ang Filipino Community sa kanilang napakagandang interpretasyon ng awiting Heal the World. Maging si Assessore Rosa Maria de Giorgi ng Pubblica Istruzione say nagsabi na ang ipinakita ng mga batang pinoy ay ang tunay na kahulugan ng integrasyon, pagkakaisa at kapayapaan. Pinuri naman ng taunang Host na si Daniella Morozzi si Romy Alonzo dahil sa kaniyang husay sa pagtuturo sa mga batang Pinoy ng San Barnaba Children’s Choir.

Bukod sa makahulugang partisipasyon ng mga batang Pinoy, ipinagmamalaki din ng mga Pilipino ang isang batang pinay si Michelle Alonzo, miyembro ng Piccolo Coro Melograno. Si Michelle ang kauna-unahang batang Pinay na naging miyembro ng isang sikat at prestihiyosong choral group  ng mga bata sa Italya na nagrerecord na rin ng mga awitin. Ang Melograno ang naging highlight sa mga pagtatanghal sa okasyong nabanggit.

Nakakalungkot lamang na sa dami ng naghangad na manood ay hindi lahat ay napapasok sa teatro dahil sa kakulangan ng upuan. Humingi naman ng paumanhin si Peccioli dahil dito. Si de Giorgi naman ay nangakong pipilitin nila sa mga susunod na pagdiriwang na kumuha ng mas malaking pwesto para sa pagdiriwang katulad ng Teatro Verdi at Mandela Forum sa dahilang ito ang naging pakiusap ni Outgoing President of Council of Foreign Citizens ng Firenze na si Divinia Capalad na nalungkot sa pangyayari.

Iba’t ibang presentasyon, may sayaw at awitin ng mga bata mula sa iba’t ibang lahi. Arabo, Intsik, Sri Lankese, Senegals, Palestinians, Italians at iba pa ang pumailanlang sa tanghalan. Kasama din ng San Barnaba Children’s Choir na  nagperform sina Jimberly Amazona ng JIL at Pamela Ruth Baon ng Adimef - pagsasamang lalong nagbigay kahulugan sa salitang “peace” regardless of religion at race na pinagmulan.

Nagpapasalamat naman ang Council of Foreign Citizens sa kooperasyon ng FCCF sa pangunguna ni Sis. Erlita Bautro at sa Cultural Commission na pinamumunuan ni Konsehal Perla Jocson sa tulong ni Shiela Capalad na kasamang nagturo ni Romy Alonzo sa mga batang Pinoy. (Tess Salamero)

Pinamagatang “MAGNEGOSYO TAYO”, pagsasanay sa mga OFWs sa mga pangunahing kaalaman at kasanayan sa pagsisimula ng isang negosyo sa Pilipinas.
Bilang tugon sa programang “reintegration” ng Embahada ng Pilipinas sa mga manggagawang Pilipino kung sakaling dumating ang panahon na magdesisyon silang tuluyan ng mamalagi sa Pilipinas, ang Department of Trade & Industry (DTI) ay nagsagawa ng isang pagsasanay na pinamagatang “MAGNEGOSYO TAYO”.  Mga pangunahing kaalaman at kasanayan sa pagtatayo at pagpapatakbo ng isang negosyo sa Pilipinas ang naging tampok sa nasabing pagsasanay. 
Ang seminar ay pinangunahan ng ating Commercial Attachè, Mr. John Paul “JP” B. Iñigo., kaagapay si Ms. Marie Gumabon-Lami, Assistant Trade Representative. Kasama sa nasabing pagsasanay ang pagtuturo sa mga participants kung paano magsagawa ng  “Business Plan” bilang paghahanda sa pagsisimula ng negosyong kanilang naisipang itaguyod sa Pilipinas.  Dalawang grupo ang naghanda ng presentasyon na naging highlights sa kanilang pagtatapos na isinagawa noong Marso 21, 2010 sa bagong tanggapan ng DTI sa Via della Balduina, 84. 

Naimbitahan bilang mga hurado sina Ms. Elsa Asuncion-Lim, Managing Director ng Landbank, Consul Lilibeth V. Pono at ang bagong Managing Director ng PNB Italy na si Mr. Vic E. Cobarrubias (na kinatawan ng may-akda dahil sa kanyang biglaang pag-uwi sa Pilipinas).  Malaki ang pasasalamat ng lahat sa pagdalo ng ating Consul General and Minister Danilo T. Ibayan na namangha ng malaki sa ginawang preparasyon ng dalawang grupo. 
Ang mga presentasyon ng “Business Plan” ay kinabilangan ng kani-kanilang mga business objectives, company overview, market environment, target market, marketing and sales strategies, revenue assumptions, operation plan, financial plan and loan requirement, at marami pang iba.  Malaki ang naitulong ng mga suhestiyon ng mga hurado para sa lalo pang ikakaayos ng mga panukalang negosyo ng dalawang grupo.

Magtayo ng palestra sa San Pedro, Laguna na tatawaging Villa Olympia Fitness and Wellness Center ang negosyong naisipan ng grupo nina Ms. Perlita C. Selosa, dating school principal at mahigit ng 30 taon na nagtatrabaho sa Italya.  Kasama niya sa grupo sina Ms. Teresita Borromeo, dating Medical Secretary at ngayon ay isang caregiver, Ms. Jean Dizon-Toccaceli, nagtapos ng B. S. Business Administration sa Central Colleges of the Philippines at nag-aral ng massage techniques sa Centro di Formazione Professionale sa Milan at Ms. Mary Triumfante, isa ding dating guro at mahigit ng 20 taong naninirahan sa Italya.  Lahat sila ay naniniwala at umaasa na sila ay magtatagumpay sa negosyong naisipan mabigyan lamang ng tamang  oportunidad at pagkakataon.
Goto Lugaw Special, Inc. naman ang napagkasunduang pangalan ng negosyong itatayo ng anim na OFWs na nagkasundo-sundo dahil pare-parehong pagluluto ang kanilang hilig.  Ang Goto Lugaw Special sa isa sa pinakamaabalang bus terminals sa Cubao, Quezon City ang tugon ng grupo sa mga naghahanap ng madaliang makakain pagkatapos ng mahabang biyahe. 

Ang magiging Presidente at Store Manager ng Goto Lugaw Special ay si Ms. Betty Balangue, Human Resources Department ang magiging assignment ni Ms. Cora Dantes.  Planning and Finance ang pagkakaabalahan ni Ms. Tess Borje samantalang Operations and Purchasing naman ang kay Ms. Emerita Gepayo.  Malaki ang maitutulong sa background sa pananalapi ni Ms. Buena Gotangonan dahil siya ang magiging Auditor ng kumpanya.  Siguradong  pakikinabangan naman ang mga bagong marketing ideas ni Mr. Keith Tuazon kapag nanungkulan na siya bilang Marketing and Promotions Manager ng Goto Lugaw Special.
Sa naging malaking tagumpay ng first batch ng Basic Seminar on Entrepreneurship - “Magnegosyo Tayo” ng DTI, tiyak na tuloy na tuloy na ang mga susunod pang mga grupo sa ganitong mga uri ng pagsasanay.  Akmang akma rin ang higit na malaki at maaliwalas na bagong tanggapan ng DTI para sa mga ganitong seminar.  Mula sa pahayagang “Ako Ay Pilipino”, ang aming pagbati sa mga nagtapos at more power sa DTI!  (Rogel Esguerra Cabigting)

More Articles...