Komunidad - Ako Ay Filipino

Muling naipakita ng mga batang pinoy ang kanilang talento sa pag-awit at sila’y pinuri ni Assessore Rosa Maria de Giorgi ng Pubblica Istruzione.  

Sa Teatro Puccini, Firenze noong ika-28 ng Marso 2010, matagumpay na konsiyerto para sa pagdiriwang ng “Pace Dei Bambini” (Kapayapaan para sa mga Bata) ang hinahangaan ng mga manonood. Ang partisipasyon ng batang Pinoy ay lubhang hinahangaan at walang humpay na palakpakan at sigawan dahil sa tuwa at paghangan ng mga manonood nang awitin ng mga ito ang “Heal the World” at “You Raise me Up”.  

Pinuri at pinasalamatan naman ni Sig. Mario Peccioli, director ng Melograno Piccolo Coro ang Filipino Community sa kanilang napakagandang interpretasyon ng awiting Heal the World. Maging si Assessore Rosa Maria de Giorgi ng Pubblica Istruzione say nagsabi na ang ipinakita ng mga batang pinoy ay ang tunay na kahulugan ng integrasyon, pagkakaisa at kapayapaan. Pinuri naman ng taunang Host na si Daniella Morozzi si Romy Alonzo dahil sa kaniyang husay sa pagtuturo sa mga batang Pinoy ng San Barnaba Children’s Choir.

Bukod sa makahulugang partisipasyon ng mga batang Pinoy, ipinagmamalaki din ng mga Pilipino ang isang batang pinay si Michelle Alonzo, miyembro ng Piccolo Coro Melograno. Si Michelle ang kauna-unahang batang Pinay na naging miyembro ng isang sikat at prestihiyosong choral group  ng mga bata sa Italya na nagrerecord na rin ng mga awitin. Ang Melograno ang naging highlight sa mga pagtatanghal sa okasyong nabanggit.

Nakakalungkot lamang na sa dami ng naghangad na manood ay hindi lahat ay napapasok sa teatro dahil sa kakulangan ng upuan. Humingi naman ng paumanhin si Peccioli dahil dito. Si de Giorgi naman ay nangakong pipilitin nila sa mga susunod na pagdiriwang na kumuha ng mas malaking pwesto para sa pagdiriwang katulad ng Teatro Verdi at Mandela Forum sa dahilang ito ang naging pakiusap ni Outgoing President of Council of Foreign Citizens ng Firenze na si Divinia Capalad na nalungkot sa pangyayari.

Iba’t ibang presentasyon, may sayaw at awitin ng mga bata mula sa iba’t ibang lahi. Arabo, Intsik, Sri Lankese, Senegals, Palestinians, Italians at iba pa ang pumailanlang sa tanghalan. Kasama din ng San Barnaba Children’s Choir na  nagperform sina Jimberly Amazona ng JIL at Pamela Ruth Baon ng Adimef - pagsasamang lalong nagbigay kahulugan sa salitang “peace” regardless of religion at race na pinagmulan.

Nagpapasalamat naman ang Council of Foreign Citizens sa kooperasyon ng FCCF sa pangunguna ni Sis. Erlita Bautro at sa Cultural Commission na pinamumunuan ni Konsehal Perla Jocson sa tulong ni Shiela Capalad na kasamang nagturo ni Romy Alonzo sa mga batang Pinoy. (Tess Salamero)

Sa edad na siyam na taon, umani na ng maraming karangalan sa larangan ng karate ang Pilipinong Karate Kid

Hindi na mabilang ang mga kabataang Pilipino na unti-unting tumatawag ng pansin at nakikilala sa Italya dahil sa kani-kanilang pag-angat sa iba’t-ibang larangan.  Isa na dito ang siyam na taong gulang na si Carl Vincent Ortega Aloya na namamayagpag sa larangan ng KARATE.  Si Carl Vincent ay nakasanayan ng tawaging Carlo ng kaniyang mga magulang at malapit na mga kamag-anak.  Siya ay  ipinanganak noong Oktubre 23, 2000, mismo sa siyudad ng Terni.  Siya ay panganay na anak nina Mr.  & Mrs. George Napa Aloya na naninirahan sa Terni sa loob na ng mahigit na labing-limang taon.

Hindi naman katakatakang magkaroon ng malaking interes si Carlo sa karate dahil ang kanyang tatay na si George ay dati ng kasapi ang iba’t-ibang pangkat sa Pilipinas na may kinalaman sa self defense, katulad ng Arnis, Judo Karate at Taekwando.  Sa kasalukuyan, siya ay aktibo pa rin sa mga pagsasanay ng Kali Silat at Krav Maga Contact Combat sa Terni.

Sa loob lamang ng tatlong taon magmula ng magsanay si Carlo ng karate ay agad siyang kinakitaan ng mabilis na pag-unlad sa nasabing larangan.  Isang pagpapatunay nito ay ang mga premyong medals na nakamit ni Carlo sa iba’t-ibang mga karate competition sa Italya.  Maituturing na hindi masyadong naging maganda ang resulta ng kauna-unahang competition kung saan isinali si Carlo pagkaraan lamang ng tatlong buwan na pagsasanay. Hindi naman nadismaya si Carlo sa resulta ng nasabing kompetisyon at itinuring na lamang niyang isang malaking hamon ang kanyang pagkatalo. 

Hindi naman siya nabigo dahil ang kanyang sumunod na laban, sa kompetisyong First Coppa del Presidente Kata noong Pebrero 22, 2009 na ginanap sa Monterotondo, nakamit niya ang ikalawang pwesto.  Itinuturing ng batang si Carlo na ang pinaka-espesyal na competition na kanyang nasalihan ay ang 3° Campionato Italiano e Coppa Italia na naganap noong Abril 17-18, taong kasalukuyan sa Tivoli. 

Bukod sa nakamit niya ang markang 1° Classificato, marami din siyang nakilalang mga bagong kaibigan sa nasabing kompetisyon.

Si Carlo ay kasalukuyang sinasanay ni Maestro Luigi Gigante (Maestro di Karate 5 dan) sa ilalim ng grupong Shitoryu Shikokai Union Karate Italia.  Mismong si Maestro Luigi ang nagbansag kay Carlo na “il piccolo drago” dahil sa kanyang sunod-sunod na pagkapanalo sa iba’t-ibang mga karate competition sa bansa.  Bukod pa dito, sa murang edad na siyam, si Carlo ay kinakitaan din ng matinding pagmamahal at dedikasyon sa karate. 

Hindi lamang sa karate champion si Carlo dahil matataas din ang kanyang mga grades sa halos lahat ng kanyang subjects. Music at History ang kanyang paboritong mga subjects.  Sa kanyang paglaki, pinapangarap niyang maging maestro din ng karate.  Si Carlo ay nakatakdang magpakitang gilas sa Cambio di Cintura sa darating a Sabado, Hunyo 26 at nakakasigurado ang lahat na habang binabasa ninyo ang artikulong ito ay naipagkaloob na kay Carlo ang plain orange belt (Nang siya ay nakapanayam noong Hunyo 22, ang kanya pang hawak na belt ay yellow-orange). 

Walang kaduda-duda na kayang kaya niyang masupera ang pagsusulit sa pagpapalit ng belt.  Todo todo ang suportang ibinibigay ng mga magulang ni Carlo sa kanya, kasama na ang bunso niyang kapatid na si Alessandro. Kaya naman walang duda ang magiging tagumpay pa niya sa larangan ng karate sa darating na panahon.

Para sa future black-belter na si Carlo, ikinakarangal ka ng bawa’t Pilipino.  Sana ay maging huwaran ka ng iba pang batang Pilipino na naririto sa bansang Italya.  Mabuhay ang mga kabataang Pilipino sa Italya! (Rogel Esguerra Cabigting)

WELL REPRESENTED (kung ituturing sa heyograpikong pinagmulan) ang Executive Leadership Training ng POLO-OWWA AT PILIPINAS-OFSPES na dinaluhan ng mga iba’t ibang FILCOM Leaders and Representatives na nagmula pa sa iba’t ibang Rehiyon at Probinsya ng Gitna at Timog Italya noong ika-7 ng Marso taong kasalukuyan sa Basilica Parrocchiale Salesiana “Sacro Cuore di Gesu a Castropretorio – Via Marsala, 42 Roma.

 

Ang isang araw na training na kinapalooban ng evaluation of leadership at leadership experiences ay dinaluhan ng mga leaders mula sa Sardegna, Reggio Calabria, Roma, Tuscany, Abruzzo, Campania at marami pang iba. Naging Resource Speaker ng nasabing importanteng pagtitipon ang respetadong trainor na si Dr. Juan A. Kanapi ng Ateneo School of Government . Isa rin siya sa mga kumikilala at nagtataguyod ng mga training sa mga nagiging successful na NGO’s sa Pilipinas. Layunin ng  nasabing pagsasanay ang kilalanin ang kakayahan ng bawat FILCOM Leaders at  mapalakas ang ugnayan ng bawat leader sa Italya  nang sa ganoon ay mapadali ang pagkakaroon ng access of  impormasyon at resources ng bawat isa.

 

LEADER vs MANAGER

 

Matapos ang unang bahagi ng sesyon, ang pagpapakilala ng mga bawat kinatawan hinggil sa lugar kung saan matatagpuan ang kanilang grupo at ang kanilang ginagampanan sa Filipino Community, inumpasang talakayin ni Propesor Kanapi ang pagkilala sa isang Leader at Manager at ang kaibahan nito sa isa’t isa. Naging pambukas kaisipan ito sa marami lalo na’t ng kanyang linawin na may magagaling na leader ngunit hindi magaling na manager or vice versa. Na lalo’t kung ipagpipilitan din lang naman na gampanan ay magiging problema lamang ito ng Asosasyon or grupo. Sa halip kung sakaling hindi makayanang baguhin ang stilo, mas makabubuting tanggapin na lamang ang kanyang limitasyon at ipa-ubaya sa mas may kakayahan nito ang nasabing tungkulin. Mahalagang natalakay din ang mga kakayayahan o naging puhunan ng mga dumalo kung bakit sila unang pinakinggan ng kanilang mga miyembro. At karamihan sa mga dumalo ay nagkaroon ng break na pakinggan ng tao dahil sa kanilang mga kaugnayan o ginampanan sa panrelihiyong gawain ng kanilang mga komunidad.

 

HUWAG (tayong) MAGPATAYAN NG ORGANISASYON. MAGTULUNGAN TAYO SA PAGPAPALAGO NITO.

 

Malaking paghamon sa lahat ng mga Leader ang naging pahayag ni Welfare Officer Ann Gregorio tungkol sa karanasan ng pagbuo at  pagkakaron ng sigalot ng mga FILCOM sa Italya. Kadalasan, sa halip na harapin ang win-win solusyon sa tuwing may problema ang anumang asosasyon, umaabot ito sa pag bi-break-away ng grupo na humahantong sa pagbubuo na panibagong grupo na may kimkim na galit, sama ng loob AT layuning siraan ang grupong inalisan. At ito ang nagiging dulot ng kawalan ng pagkakaisa ng bawat grupo at kooperasyon. Kung kaya nga’t sa bahagi ng OWWA-POLO at sa serbisyo nito, hindi lang OWWA Membership at benipisyong pagpapauwi ang kanilang ginagampan para sa mga OFWS. Ayon sa kanila, Training at Value Formation din ang kanilang ginagampanan para sa manggagawa sa ibayong dagat. Kaugnay din dito ang pagpapakila sa bagong Labor Attache na si Labatt Chona Mantilla.

 

MAGING BUKAS SA IBA PANG OPORTUNIDAD at KILALANIN ANG GALING NG PINOY

 

Patuloy ang PILIPINAS-OFSPES ( Overseas Filipinos Society for the Promotion of Economic Security) sa pagtataguyod at pagtulong sa mga Pilipino partikular sa Italya na magkaroon ng lakas ng loob na harapin ang mga bagong oportunidad at matutong kilalanin ang mas mahusay at magaling na Pilipino. Kailangang patuloy na pangarap. Harapin ang mga bagong oportunidad. (Hindi ang mag trabaho ng sa bahay lamang). Kung kaya naman, patuloy ang pagsasagawa  ng OFSPES ng mga  Leadership ang Social Entreprenuership Training Program for Migrants sa tulong ng Ateneo School of Governments.

 

PAGTATAPOS

 

Pinagkalooban ang bawat isa ng Certificate of Attendance sa pagtatapos ng buong araw na training – ng  may paghamon at paghahangad na ipagpatuloy ang collaboration ng bawat isa. At isang mungkahi ng mula sa Confed ng Tuscany, “Puede bang sa Florence ganapin ang susunod na Leadership Training? Then we go to Cagliari or in Napoli…. At ang lahat ay sumagot… Why not? Basta’t may Resource Person na kasing galing ni DR. Juan Kanapi.”  To all Leaders… hanggang sa muli! (Elmer Orillo)

 

 

 

Kabilang sa pangunahing layunin ng Filipino Women Migrants Association of Northern Italy (FILWOMAN) ang matulungan ang mga kababaihan dito sa Hilagang Italya partikular sa aspeto ng kalusugan.

Kaya naman, inilunsad ng FILWOMAN ang proyekto na nagbigay pagkakataon sa mga kababaihan na maipa konsulta ang kanilang kalusugan lalong lalo na ang reproductive system. Ang proyekto ay tinawag na “Preventive Medicine” the secret to successful, healthy living!

Isang Italian obstetrician/gynecologist ang sumusuporta sa grupo para maipatupad ang mga welfare projects nito. Mahigit sa dalawampung kababaihan ang nagtungo sa Centro Medico Sant’Agostino, isang pribadong klinika, upang sumailalim sa PAP TEST.

Ipinaliwanag ni Dott’sa Letizia Parolari, OB/GYNE, ang  kahalagahan ng pagpapakonsulta lalong-lalo na ng reproductive system upang maiwasan ang pagkakaroon ng cervical cancer. Marami umano sa mga kababaihan hindi lamang sa mga Pilipino, ang naisasantabi ang kalusugan dahil sa kawalan ng panahon.

Ayon naman kay Angelina Rodriguez, ang Filipina midwife na tumutulong kay Parolari,  iba’t iba ang mga problemang nararanasan ng mga kababayang nanganganak dito sa Italya.  Kabilang dito ang panganganak sa napakamurang edad tulad ng  katorse, ang iba naman umano ay na de-desperado dahil ayaw panindigan ng ama ng bata ang anak, at  meron din umano’ng mga labis na nagkakaproblema dahil may kapansanan ang sanggol.

Pinuri naman ng mga kababaihan ang proyekto ng FILWOMAN.  Ayon sa kanila ang awareness na ibinahagi ng grupo kaugnay sa kalusugan ng mga kababaihan ay napakahalaga. Sinabi ni Elsie Gubat-Manlangit,  nakatulong  umano sa kanila ang PAP Test dahil hindi na umano nila ito naiisip na gawin kahit umuuwi sila sa Pilipinas. Ang alam lamang umano nila ay ang Pap Test ay isang cleaning process ngunit di  nila alam na malaki ang kinalaman nito upang mabatid kung may diperensya ang reproductive system ng isang babae.

Sinabi pa ni Parolari  na mahalaga ang paglulunsad ng mga seminar at mga pagtitipon lallong lalo na sa mga kabataan upang makapag bigay impormasyon ukol sa kalusugan.

Bilang pasasalamat sa walang-sawang paggabay ni Parolari sa mga kababaihan, isang crystal vase ang ipinagkaloob dito ng FILWOMAN. (Zita Baron)

Pinamagatang “MAGNEGOSYO TAYO”, pagsasanay sa mga OFWs sa mga pangunahing kaalaman at kasanayan sa pagsisimula ng isang negosyo sa Pilipinas.
Bilang tugon sa programang “reintegration” ng Embahada ng Pilipinas sa mga manggagawang Pilipino kung sakaling dumating ang panahon na magdesisyon silang tuluyan ng mamalagi sa Pilipinas, ang Department of Trade & Industry (DTI) ay nagsagawa ng isang pagsasanay na pinamagatang “MAGNEGOSYO TAYO”.  Mga pangunahing kaalaman at kasanayan sa pagtatayo at pagpapatakbo ng isang negosyo sa Pilipinas ang naging tampok sa nasabing pagsasanay. 
Ang seminar ay pinangunahan ng ating Commercial Attachè, Mr. John Paul “JP” B. Iñigo., kaagapay si Ms. Marie Gumabon-Lami, Assistant Trade Representative. Kasama sa nasabing pagsasanay ang pagtuturo sa mga participants kung paano magsagawa ng  “Business Plan” bilang paghahanda sa pagsisimula ng negosyong kanilang naisipang itaguyod sa Pilipinas.  Dalawang grupo ang naghanda ng presentasyon na naging highlights sa kanilang pagtatapos na isinagawa noong Marso 21, 2010 sa bagong tanggapan ng DTI sa Via della Balduina, 84. 

Naimbitahan bilang mga hurado sina Ms. Elsa Asuncion-Lim, Managing Director ng Landbank, Consul Lilibeth V. Pono at ang bagong Managing Director ng PNB Italy na si Mr. Vic E. Cobarrubias (na kinatawan ng may-akda dahil sa kanyang biglaang pag-uwi sa Pilipinas).  Malaki ang pasasalamat ng lahat sa pagdalo ng ating Consul General and Minister Danilo T. Ibayan na namangha ng malaki sa ginawang preparasyon ng dalawang grupo. 
Ang mga presentasyon ng “Business Plan” ay kinabilangan ng kani-kanilang mga business objectives, company overview, market environment, target market, marketing and sales strategies, revenue assumptions, operation plan, financial plan and loan requirement, at marami pang iba.  Malaki ang naitulong ng mga suhestiyon ng mga hurado para sa lalo pang ikakaayos ng mga panukalang negosyo ng dalawang grupo.

Magtayo ng palestra sa San Pedro, Laguna na tatawaging Villa Olympia Fitness and Wellness Center ang negosyong naisipan ng grupo nina Ms. Perlita C. Selosa, dating school principal at mahigit ng 30 taon na nagtatrabaho sa Italya.  Kasama niya sa grupo sina Ms. Teresita Borromeo, dating Medical Secretary at ngayon ay isang caregiver, Ms. Jean Dizon-Toccaceli, nagtapos ng B. S. Business Administration sa Central Colleges of the Philippines at nag-aral ng massage techniques sa Centro di Formazione Professionale sa Milan at Ms. Mary Triumfante, isa ding dating guro at mahigit ng 20 taong naninirahan sa Italya.  Lahat sila ay naniniwala at umaasa na sila ay magtatagumpay sa negosyong naisipan mabigyan lamang ng tamang  oportunidad at pagkakataon.
Goto Lugaw Special, Inc. naman ang napagkasunduang pangalan ng negosyong itatayo ng anim na OFWs na nagkasundo-sundo dahil pare-parehong pagluluto ang kanilang hilig.  Ang Goto Lugaw Special sa isa sa pinakamaabalang bus terminals sa Cubao, Quezon City ang tugon ng grupo sa mga naghahanap ng madaliang makakain pagkatapos ng mahabang biyahe. 

Ang magiging Presidente at Store Manager ng Goto Lugaw Special ay si Ms. Betty Balangue, Human Resources Department ang magiging assignment ni Ms. Cora Dantes.  Planning and Finance ang pagkakaabalahan ni Ms. Tess Borje samantalang Operations and Purchasing naman ang kay Ms. Emerita Gepayo.  Malaki ang maitutulong sa background sa pananalapi ni Ms. Buena Gotangonan dahil siya ang magiging Auditor ng kumpanya.  Siguradong  pakikinabangan naman ang mga bagong marketing ideas ni Mr. Keith Tuazon kapag nanungkulan na siya bilang Marketing and Promotions Manager ng Goto Lugaw Special.
Sa naging malaking tagumpay ng first batch ng Basic Seminar on Entrepreneurship - “Magnegosyo Tayo” ng DTI, tiyak na tuloy na tuloy na ang mga susunod pang mga grupo sa ganitong mga uri ng pagsasanay.  Akmang akma rin ang higit na malaki at maaliwalas na bagong tanggapan ng DTI para sa mga ganitong seminar.  Mula sa pahayagang “Ako Ay Pilipino”, ang aming pagbati sa mga nagtapos at more power sa DTI!  (Rogel Esguerra Cabigting)

Panahon, nakisama…

Matapos makaranas ng halos isang linggong pag-uulan,.. gumanda ang panahon noong Sabado sa huling araw ng tatlong araw na selebrasyon ng carnevale ambrosiano, ang carnevale sa Milano.

Ikinatuwa ng mga Milanesi at mga migrante ang pakikisama ng panahon upang ma-enjoy ang carnevale ambrosiano.  Nakisaya at nakigulo din ang mga Pinoy sa festive season na isineselebra  bago magsimula ang kuaresma .

Ayon sa ilang Pinoy, ipinagdasal nila ang pagkakaroon ng magandang panahon upang maipagdiwang ang carnevale.  Ang ilan naman ay lumiban na sa kanilang mga trabaho upang madala ang kanilang mga anak sa Piazza Duomo upang ma enjoy ang carnevale.

Dumagsa sa Piazza Duomo ang napakaraming pamilya kasama ang kanilang mga anak na nakasuot ng ibat ibang kasuutan o kaya naman ay nakamaskara.

Pabonggahan din ang mga batang Pinoy sa kani-kanilang costume.

Bagamat sa ibang lugar, ang carnevale ay isineselebra sa mga araw bago sumapit ang  Ash Wednesday,  kadalasan ay nagtatapos sa araw ng Martes kung kailan isineselebra ang Mardi gras (Fat Tuesday), ang pagdiriwang ng carnevale sa Milan o ang carnevale ambrosiano ay nagtatapos sa araw ng Sabado  (Samedi gras o fat Saturday)  matapos ang ash Wednesday. Gayunman, kadalasan ang carnevale ay nagsisimula sa unang araw ng Linggo bago sumapit ang ash Wednesday.

Ayon sa mga pag aaral, ang carnevale ay nagmula sa Italian word ’carne levare’ na ang ibig sabihin  ay alisin ang karne dahil ipinagbabawal ito tuwing kuaresma sa mga katoliko.

Ayon naman sa Late Latin expression  , ang ­’carne vale’ ay farewell to meat nangangahulugang ito na ang mga huling araw na maaaring  kumain ng karne bago sumapit ang fasting season.  (Zita Baron)

Inaasahan ang mas matibay na kooperasyon sa pagitan ng Konsulado at Filipino communities sa Hilagang Italya matapos dumalo ang napakaraming Filcom leaders sa kauna-unahang pagtitipon na ipinatawag ng Konsulado para sa mahahalagang anunsyo.

Inihayag sa pagpupulong ang mahahalagang anunsyo kabilang ang paglulunsad ng website ng konsulado ng Milan, ang tungkol sa huling araw ng pag-iisyu ng berdeng pasaporto sa Marso a-trenta y uno,  mga requirements para sa pagkuha ng foreign service exam,  at ang mga holidays ng konsulado sa darating na semana santa.

Gayundin, inanunsyo din ang  araw na  muling pasisimulan ang review sessions para sa mga nurse na nais na kumuha ng Italian board examination. Kaugnay nito,  inihayag din ng konsulado na maganda ang resulta ng sa unang batch ng kumuha ng eksamen upang ganap na maging rehistradong nurse sa Italya.  Sa lima umanong kumuha, tatlo ang nakapas. 

Dahil dito,pinuri ng konsulado ang inisyatiba ng The Philippine Nurses  Association of Milan o TPNAM, ang  kauna-unahang  organisasyon ng mga nurses sa Milan.  Ito ay pinangungunahan ni  Dott.sa Marilu de la Fuente bilang adviser ng grupo at Tess Benavente bilang pangulo.

Inanunsyo din ang petsa ng pormal na pagsisimula ng overseas absentee voting sa April 10 at tatagal hanggang  May 10. Hinikayat ni  Consul General Antonio Morales ang mga qualified voters na bomoto at huwag palampasin ang mahahalagang araw na ito. Sinabi ni Morales na dapat gamitin ng OFWs ang pagkakataon  ito upang makapili ng magiging lider ng bansa.

Kabilang din sa highlight ng  pagpupulong ang pagpapakilala sa Filcom leaders ng bagong talagang labor attaché na  si Annabella  Marie Oliveros.

Nagpasalamat naman si Oliveros sa umanoý mainit na pagtanggap sa kanya ng mga kababayan sa Milan. Tiniyak din nito ang pagiging bukas at pagkakaroon ng transparency sa Philippine Overseas Labor Office o POLO. (Zita Baron)

More Articles...