BABAE, ISA KANG HUWARAN

Ang babae ay inihahalintulad sa mamahaling perlas at babasaging kristal. 

 

Sa dinami-daming, Nilikha ng Diyos

May isang nilalang, Hinubog inayos

Ginawang babae, Na tagapag-ayos

Sa gawaing-bahay, Siya ang tatapos

 

Babae, Ikaw ay dakila

Mamahaling perlas, Na idadambana

Angkin mong alindog, May dalang hiwaga

Sa pusong may lungkot, Nagbibigay tuwa

 

Dapat kang igalang, At pakamahalin

Ng sinumang sayo’y, Magtangkang aangkin

Babasaging kristal, Ang iyong kahambing

Na dapat ingatan, At paka sambahin

 

Isa kang maybahay, At ulirang Ina

Inang maawain, Sa anak mong dala

Siyam na buwang ako, Na iyong kinarga

Sa sinapupunan, Oh Mahal Kong Ina

 

Nang ako’y isilang, Sa mundong ibabaw

Iyong inilaan, Ang angkin mong buhay

Hindi ka nagsawang, Ako’y alagaan

Ako ay lumaki, Sa iyong kandungan

 

Ang lakas ng iyong, Pagiging babae

Na ipinamalas, Sa araw at gabi

Sa pag-aalaga, Sa anak nya kasi

Mula nang isilang, Hanggang sa lumaki

 

Ang taglay mong tinig, Ay umalingawngaw

At sa buong bayan, Nagsilbing batingaw

Ipinaglaban mo, Sa mundong ibabaw

Na ikaw ang siyang, Magsisilbing ilaw

 

Ikaw ay bumuo, Ng isang samahan

Upang makilala, Ang kababaihan

Ginawa mo itong, May paninindigan

Na ang tanging hangad, Magsilbi sa bayan

 

Nasabing samahan, Ngayo’y matatag na

At mayrong binuong, Mga plataporma

Isang karangalang, Dapat ideklara

Sa mga susunod, Dapat ipamana

 

Sa araw na ito, Ng kababaihan

Ang mga babae’y, Dapat na magdiwang

Ito’y isang dilat, Na katotohanan

Na tayo’y bahagi, Ng ating lipunan. 

 

 

ni: Letty M. Manalo