Ama ko, patawad po sa aking mga kasalanan.
Sa Krus na kahoy ay ipinako Ka
Nang Iyong tubusin ang pagkakasala
Sugat sa balikat na Iyong binata
Nagsilbing liwanag ng mundong kay ganda
Ikaw ay inapi niyong mga hunghang
Niyong mga hudyong kaluluwa’y halang
Dahil sa tindi ng aking kasalanan
Lahat ng pasakit ay Iyong nakamtan
Ika’y pinutungan ng koronang tinik
At pinainom Ka ng apdong kay pait
Tinanggap Mong lahat ang mga paglait
Sa kamay ng mga taong malulupit
Binigyan Mo ako ng buhay at lakas
At inilagay Mo sa tronong mataas
Ginawa Mo akong marunong na pantas
Upang masundan ko ang tuwid na landas
Ngunit ako’y taong sobrang nang abuso
Hindi ko sinunod ang mga utos Mo
Sa tuwid na landas ay lumihis ako
At aking pinili daang maka-mundo
Tawag ni satanas ay aking dininig
Bawat alok niya ay aking kinabig
Namungad sa puso ang matinding galit
At nalimutan ko tamis ng pag-ibig
Ang kasalanan ko ang naging pabigat
Sa Krus na pasan mo sa iyong balikat
Masaganang dugong nagmula sa sugat
Ang siyang humugas sa sala ng lahat
Ngayong ako’y balot ng pagkakasala
Sa pasan mong Krus naging pabigat pa
Kahit ko sunugin aking kaluluwa
Kulang pang ibayad sa ‘Yong pagdurusa
Kay bigat ng aking naging kasalanan
Na ipinatong ko sa Krus Mong pasan
Ngayon ang hiling ko ay kapatawaran
Sa kasalanan kong pinagsisishan
Sa araw na ito ng Mahal Na Araw
Poon ko patawad ang tangi kong sigaw
Nawa’y manguna Ka sa bawat kong galaw
At Iyong punuin ang puso kong uhaw
ni: Letty Manigbas Manalo
