Muli’y aking hahawakan,
Ang pluma kong namahinga
At muli kong gigisingin,
Ang tulog kong alaala
Muli’y aking bubuklatin,
Mga tiklop na pahina
Upang muling isigaw ko,
PILIPINAS MABUHAY KA!!!
Muli’y aking susubukan,
Ang pluma ko ay iguhit
At sa diwa’y hahanapin,
Ang nawalang mga titik
Sa puso ko’y pipilitin,
Na muli kong maibalik
Ang maalab kong pag -asa,
At marubdo kong pag-ibig
Ang mundo kong gumuho na,
Ay muli kong bubuoin
Upang muling paghandaan,
Mga araw na darating
Ang lakas na watak-watak,
Isa-isang pupulutin
Upang bigyang katuparan,
Ang marubdob kong hangarin
Sa dulo ng bahaghari,
May pag-asang naaninag
Na muli kong mabubuo,
Putol-putol kong pangarap
Sa madilim na bahaging,
Binalot ng alapaap
Isang PERLAS NG SILANGAN
Ang naghatid ng liwanag
Inang Bayang Pilipinas,
Isang bagay ang tiyak ko
Sa iyo ko ibibigay,
Ang lakas na tinipon ko
Kung sakaling may magtangka,
Na agawin ang lupa mo
Magbabangon sa libingan,
Ang bangkay ng Pilipino
Ang banderang tatlong kulay,
Pula puti’t saka bughaw
Tatlong bayan ang sagisag,
Luzon Visaya’t Mindanaw
Ang araw na nalalapit,
Ay ARAW NG KAPAYAAN,
Halina at magka-isa,
Ito’y ating ipagdiwang
Ako’y isang Pilipino,
Sa dugo ko’t kaluluwa
Sa kulay at aking ilong,
Pilipinong wala duda
Akin ditong tinatawag,
Magigiting na GABRIELA
At bayaning DIEGO SILANG,
Tayo ngayo’y sama-sama
Ang araw na itinakda,
Ay ARAW NG KALAYAAN
Kaya tayo’y sama-sama,
Na ngayon ay magdiriwang,
Sa tinig na buong buo,
Malaya kong isisigaw,
MABUHAY ANG PILIPINAS,
MABUHAY ANG INANG BAYAN
Letty M. Manalo
