Kagandahan ng paligid aking napansin
kulay ng mga bulaklak napakalibot sa'tin
mga palamuting parang nakabitin
sa hangin may mga kahulugang ibig sabihin
makakapagbigay aral 'pag isa-isahin
magiging mga gabay at salamin natin
Napakatingkad na kulay itong pula
nagpapahiwatig ng pag-ibig na nagbabaga
at katapangan na sa pamayanan ay mahalaga
kung minsa'y ito ri'y nagpapakita't nagpadarama
isang nag-uumapaw at kakaibang pagnanasa
na makatulong sa'ting kumunidad at kapwa
Pati itong kulay asul ay may kahulugan
nagpapahiwatig ng kapayapaan at katahimikan
nagpapakita sa'ting lakas ng loob at isipan
upang dangal nati'y iingatan
at ipaglalaban na 'di kaylanman mawawala ang katapatan
pagpapahalaga sa'ting sinumpaan at sinimulan
Napakasaya namang kulay itong dilaw
kumakatawan sa'ting pag-asa't nagkakaisang galaw
upang hangaring makamit mga adhikai't pananaw
nagpapahiwatig din sa'ting kaligayahang nag-uumapaw
nagpapaalalang lagi laging nating balikang tanaw
mga nagawa't pinagsamahan sa mga nagdaang araw
Ang ginintuang dilaw ay para sa ating kayamanan
pwedeng isama narin diyan ang angking katalinuhan
at gayun na rin ang lakas ng katawan at kalusugan
Ang lahat ng mga ito'y magagandang katangian
diyan makikita ang katatatagan ng isang pamayanan
sa ating pagkakawanggawa ay kinakailangan
Ang kulay puti'y kaaya ayang tingnan
nagpapahiwatig sa ating pag-iibigan,
pagmamalasakit bilang magkakapatid at magkakaibigan
sa kalinisan ng mga pusong nagbago ay isang katunayan
at mga matang muling namulat sa katotohanan
na ang poon maykapal lamang ang kaligtasan
(ni BONG RAFANAN)
