MILAN, Italy – Maituturing na pinaka malaking Youth Encounter ang naganap na dalawang araw na pagtitipon ng sari-saring youth groups kamakailan dito sa fashion city.
Dinaan sa paglulunsad ng 2-day Friendship game na nilahukan ng malalaking Filipino communities ang naging paraan ng Chaplaincy ng Filipino Community of San Lorenzo (FCSL) na pinangungunahan ni Fr. Emil Santos upang malikom ang mga kabataang Pinoy dito sa Milan.
Pangunahing motibo ng pagtitipon ay maibahagi ng mga kabataang dumalo sa nakaraang World Youth Day sa Madrid, Spain ang mga karanasan ng mga ito sa kapwa kabataan dito sa Milan. Pagpapahalaga din sa mga kontribusyon ng mga kabataan sa mga komunidad ang isa pang layunin ng aktibidad na nasa ika-apat na taon na ngayon.
Para sa ilang dumalo, isang kakaibang karanasan na kailanman ay hindi makakalimutan ang mapabilang sa 2011 World Youth Day participants.
Binigyang diin ni Romar Oba, Youth for Christ member ng Filipino Community of San Lorenzo , ang nakalipas na karanasan ay magpapatatag ng pananampalataya.
“Na-experience natin kung ano bang essence ng pagiging Kalotiko, kasi di ba minsan, ganito lang,..pumupunta tayo sa simbahan, magsisimba tapos uuwi tapos magtratrabaho na for the whole week , o mag-araal na for the whole week. Parang sabi natin, ganito lang bang buhay katoliko? Kita nyo naman syempre ibato, ibang buhay, cathecism ito…” diin pa ni Oba.
Halos doble ang bilang ng mga dumalong kabataang Pinoy ngayong taon kumpara noong mga nakaraang taon.
Ipinagmalaki ni Eduardo Canlas, Presidente ng FCSL, ang motibo ng okasyon. “ Hindi lamang po sa pamamagitan ng mga religious activities kundi rin po sa mga palarong tulad nito,..dahil inaakala namin na sa ganiton pagkakataon matitipon natin ang mga kabataan at naisisik natin sa kanilang mga isipan ang kahalagahan ng isang mabuti at masunuring kabaaan sa kanyang mga magulang, sa kanyang mga kaibigan at sa kanyang pamayanan.
Para sa lahat, isang makahulugang weekend ang kanilang naranasan. Pinuri din ng Simbahan ang mga kabataan sa kanilang kontribusyon sa kanilang mga komunidad. Hangad nito na lalo pang mapalawig at mapalawak ang papel ng mga kabataan sa mga gawaing simbahan.
Naging madamdamin din ang ginanap na banal na misa na pinangunahan ni Fr. Emil. Sa ngayon, hangad ng mga magulang at ng simbahan na lalo pang tumatag ang buhay spiritual ng mga kabataang Pinoy dito sa Italya. (by: Zita Baron)
