Muli,ika'y magsimula
Bumangon kung saan ika'y nadapa
Damhin kung may nalalabi pang lakas,pag-ibig at pag-asa
Tumingin sa hinaharap ng walang pagkabahala
Ihakbang muli nanghihina pang mga paa
Pag-aalinlanga'y isantabi't maglakad ng may sigla
Muli, ika'y mangarap
Isa-isip ang magandang hinaharap
Marami mang kailangan at mahirap
Gumalaw agad at maging maagap
Bunga ng pagtitiis at pagpapagod iyong matatangap
Sa tunay na kaligayaha'y 'wag tumigil sa paghahanap
Pagkagising sa umaga'y umasang ito na’y yakap
Muli,kumilos at abutin
Mga pangarap at mga mithiin
Bawat galaw ay dapat bigyang pansin
Ang katuparan ng lahat ay sikapin
Mga salita't gawa'y marapat na pagsabayin
Kaligayaha't tagumpa'y muling kamtin
Muli,ika'y makibaka
Kung ang ngayo'y madilim at napakasama
Puno ng pagkukunwari, kasalanan,kasinungalinga't pandaraya
Ang lahat ng mga ito sa'yo'y 'wag magpahina
Paglabanan ang lahat ng may paniniwala
Pagtibayin ka sana lagi ng iyong pananampalataya
Muli, paglalakad ay simulan
Kayamanan ma'y ikaw nawalan
Umasang sa pag-ibig ika'y madaragdagan
Tumingala lagi't humiling sa kaitaasan
Pagmamahal ng Diyos na walang hanggan
Tunay at hindi ka pagkakaitan
Muli,ika'y magsimula
Kagustuha'y pagsikapan hanggang makuha
Muli,ika'y makibaka
'wag manghina't mawalan ng pag-asa
Muli, ika'y mangarap
Hingin ang patnubay ng Diyos at iyong matatanggap
(ni: Demetrio‘Bong’ Rafanan)
