Sale Sale Sale, narito ang ilang tips!

Ngayong araw, July 2, 2022, ay magsisimula ang Summer Sale 2022 sa halos lahat ng mga Rehiyon sa bansa, maliban sa Sicilia na nagsimula kahapon, July 1, at sa provincia autonoma di Bolzano na magsisimula sa July 15, 2022.

Kaugnay nito, ang Codacons, consumer’s association, ay naghanda ng mga mahahalagang paalala ukol sa tamang paraan sa pagbili ng mga produkto at pagpili ng mga shops kung saan matatagpuan ang inyong mga kinakailangan.

Narito ang ilang tips ngayong ‘saldi’

• Ang sale ay dapat na palaging sa katapusan ng bawat season: ang mga produktong sale na ibinebenta ay ang mga labi ng patapos na season at mga stocks. Layuan ang mga shops na halos wala ng laman at mabilis na napupuno sa araw ng sales. Marahil na ang mga produkto ay lipas na sa moda o luma na at peke ang mga presyo nito. 
• Mag-ingat sa mga diskuwento na mas mataas sa 50%. Ang mga negosyante ay hindi maaaring magbenta ng mas mura kaysa sa puhunan ng mga ito.
• Palaging itago ang resibo. Hindi totoo na ang mga nabiling produkto sa sale ay hindi maaaring palitan. Ang mga shops ay obligadong palitan ang mga produktong may depekto kahit na nasa sale ang mga ito tulad ng nasasaad sa art. 1495 ng Code.civ. na magreklamo sa loob lamang ng walong araw pagkalipas matuklasan ang depekto ng produkto. Gayunpaman, ang batas 24/2002 ay nagsasaad na ang mga mamimili ay maaaring mag-reklamo sa loob ng dalawang buwan mula sa petsang matuklasan ang depekto.”
• Subukan o isukat ang mga produkto: ito ay hindi obligado at dipende sa mga nagtitinda. Ngunit ipinapayong suriin mabuti ang produkto bilang pag-iingat upang hindi magpabalik-balik sa shop. 
• Upang maiwasan ang pagsisisi sa huli, mag-ikot ikot muna at huwag tumigil sa unang shop na may diskuwento. Ikumpara muna ang mga presyong nakalantad sa ibang shop upang makakakita ng mas mababang presyo.

Tips para sa pagbili

• Alaming mabuti kung ano ang kinakailangan bago pumasok ng isang shop at gumastos: hindi madaling maiimpluwensyahan ng mga salesman at hindi manganganib na dala dala ang mga bagay na hindi kailangan pag-uwi ng bahay, marahil murang nabili ngunit maaaring hindi kailanman gagamitin. Ang pagbili ng mga produkto sa mataas na halaga ay hindi nangangahulugan ng isang kalidad na produkto. Mag-ingat sa mga trademark na katulad ng mga kilalang brand.
• Mainam ang magkaroon ng mapagkakatiwalaang mga shops o bumili ng mga produktong alam na ang presyo o kalidad ng sa gayon ay malayang makakapag-isip at masusuri ang halaga nito sa pamimili pag sales na. 
• Tandaan na ang label ay kinakailangan nakalantad sa bawat produkto at dapat nakikita ang pagkakaiba ng luma at bagong presyo pati ang porsyento ng discount. Mag-ingat sa mga window shop na natatakpan ng mga poster, na nagiging dahilan upang hindi makita ang mga presyo nito. Tingnang mabuti  kung ang mga produktong nasa sale ay nakahiwalay sa mga bagong produktong hindi naka sale. 
• Kung pakiramdam ay nalinlang, maaaring lumapit sa Codacons o Municipal Office o police aid.